Mopfu 195 chilu chiihe, Naga National Movement he atsii shu kapra pha nghikoe. Siiduno Nagamei yi modu koru duno kateimei rusomei he no church chii lesii vubuloa mokhu lutie. Hebvii-a oke kashi chilu nghihe thikotu Mr. Hraili Mathibo no ojii pia Bopfii-e (izho deni Little Nazareth School) nghiki church chii kanhei kochu nasii pfoko soloe.
Oramei zhoamazhe lesii no moshu no Khristamei he pro praloe, ea church jii kopu kali solu moli shiitie to kophro lo-a mopfu 1961 ku heno church fii kaji kali Chikhrophi ki thikotu Mrs. Ashuli Henia nghino hriiloa church chii kosii kochu nahi somuchu lo-a 15th May 1965 niheno church chii he dedication soloe.
Izho deni kobu church chii nahe padei kochuna koe. Hehe church chii kosii kochuna pi bvii nghiki sokhei toe. Church henahe 10th Jan. 1987 niheno Golden Jubilee nibu leno Lipeo nghi ki thetho piotie (dedicated). Hebvii-a church chii Lipeo nghi thetho kapi ea Golden Jubilee ni a amani amashii kali so-a Lipeo yi itsii amokhro leno lia-momu lu koru duno tto out kali inule mei thopfii yi sao siilowo shu khei toe.
Theology amodo mei yi duno tto 1961 ku heno, ‘theology fund’ tto pfu kodzii thue ea izhodeni kotua okhro tsii Sunday karei nahi Lipeo yi ashila he heva heno sowe.
Mopfu 1969 kuhe no Sunday School chii kali soloe ea Mr. Kaisii Kathiprii no Sunday School le modo kapio karei nasii so-a sothue. Siithesii Chakre Chovow Church he mopfu 1970 kuheno church kali kohrii ozhe sii solo siitie tto organized church kalie tto pfu piotie.
Ichu-o Khristan sokolu mopfu reinia pongow (75) kapra oni mani kochu he, Chakre Chovow Baptist Church lehe Baptized member mei he 975 bue ea Associate member mei heno 1647 bue.
